ഒഴുകാന്‍ മറന്ന പുഴ

എന്റെ മൌനങ്ങളിലേക്ക്
നിന്റെ സ്വപ്‌നങ്ങളെ
ചേര്‍ത്ത് വയ്ക്കരുത്.

ഒഴുക്ക് നിലച്ച പുഴ,
കടലിനെ മറന്ന്‍
പോയിരിക്കുന്നു.

മധുരമായൊരു
നൊമ്പരം പോലും
ഓളങ്ങളായി
തീരം തൊടുന്നില്ല .

വെള്ളാരംകല്ലുകള്‍
തിരഞ്ഞു പോയവന്‍ ,
പുഴയാഴങ്ങളില്‍
നീലിമ തേടുമ്പോള്‍,
നിന്റെ സ്വപ്‌നങ്ങള്‍
അനാഥമാകരുത് .

ഓര്‍മ്മകളെല്ലാം സ്വര്‍ഗത്തിലേക്ക് യാത്ര പോകയാണ്.

ഒറ്റമുറിയില്‍

തനിച്ചുറങ്ങുമ്പോഴാണ്

ഓര്‍മ്മകള്‍ സ്വപ്നങ്ങളായി

വിരുന്നെത്തുന്നെത് ;

അപ്പോഴാണ്‌,

നിന്റെ കൈ പിടിച്ചു

ആകാശങ്ങളിലേക്ക്

അപ്പൂപ്പന്‍താടി പോലെ

പറന്നു പോകുന്നത്;

വരാന്തയുടെ,

കല്‍ത്തൂണിനപ്പുറം,

നിന്റെ പട്ടുപാവാടയുടെ

പച്ചപ്പ്‌ പ്രബഞ്ചമാകെ

പരക്കുന്ന്തു;

ഓര്‍മ്മകളെല്ലാം

സ്വര്‍ഗത്തിലേക്ക്

യാത്ര പോകയാണ്.

ചുറ്റിലും വീശുന്ന

കാറ്റിനു ചോരയുടെ മണം;

അപ്പോഴും പ്രണയത്തെക്കുറിച്ച്

മാത്രമീ വാചാലത;

അല്ലെങ്കില്‍,

അല്ലെങ്കിലെന്നെയിതൊരു

ആത്മഹത്യാക്കുറിപ്പായ്

വായിക്കപ്പെടുമായിരുന്നു.